मुंबई : राणी बाग येथे आयोजित करण्यात आलेल्या फुलांच्या प्रदर्शनात सुमारे ५,००० हून अधिक झाडे व रोपे रसिकांना पाहायला मिळणार असून, त्यामध्ये विविध प्रकारची फुलझाडे, फळझाडे तसेच औषधी वनस्पतींचा समावेश असणार आहे. निसर्गप्रेमी आणि बागकामप्रेमींसाठी हे प्रदर्शन विशेष आकर्षण ठरणार आहे.
यंदाच्या प्रदर्शनाचे मुख्य आकर्षण म्हणजे १३ राष्ट्रीय प्रतीकांची फुलांच्या माध्यमातून साकारलेली भव्य व कलात्मक मांडणी. ही मांडणी केवळ नेत्रसुखदच नव्हे तर प्रेक्षकांसाठी शैक्षणिक दृष्ट्याही महत्त्वाची ठरणार आहे.
फुलांच्या प्रदर्शनासोबतच बागकामासाठी आवश्यक अवजारे, विविध रोपे, खते व इतर साहित्य विक्रीसाठी स्वतंत्र स्टॉल्स उभारण्यात येणार आहेत. त्यामुळे बागकामाची आवड असणाऱ्यांसह नव्याने सुरुवात करू इच्छिणाऱ्यांसाठी ही एक सुवर्णसंधी ठरणार आहे.
तसेच, प्रदर्शनाच्या तीनही दिवसांत बागकाम विषयक कार्यशाळांचे आयोजन करण्यात आले असून, तज्ज्ञांकडून प्रत्यक्ष मार्गदर्शन दिले जाणार आहे. या कार्यशाळांसाठी १,००० रुपये सहभाग शुल्क निश्चित करण्यात आले आहे.
राणी बागेतील हे फुलांचे प्रदर्शन निसर्ग, फुले आणि बागकामाची आवड असणाऱ्या नागरिकांसाठी एक पर्वणी ठरणार असून, नागरिकांनी मोठ्या संख्येने भेट द्यावी, असे आवाहन आयोजकांनी केले आहे.
