प्रतिनिधी : मराठी पत्रकारितेमध्ये ‘आद्य पत्रकार’ म्हणून ओळखले जाणारे “दर्पण” वृत्तपत्राचे संस्थापक, संपादक आचार्य बाळशास्त्री जांभेकर यांची ६ जानेवारीला जयंती असते. आणि हाच दिवस “पत्रकार दिन” म्हणून ओळखला जातो. या दिवशी सर्व पत्रकार, माध्यम प्रतिनिधी व पत्रकारांच्या संस्था तसेच संघटना हा “पत्रकार दिन” सगळीकडे मोठया उत्साहात साजरा करतात.
याच दिवसाचे औचित्य साधून, मुंबई व महाराष्ट्रात नावाजलेला महाराष्ट्र मराठी मुक्त पत्रकार संघमार्फत देखील एका छान कार्यक्रमाचे आयोजन करण्यात आले आहे. ६ जानेवारी २०२५ रोजी बी. आर. दंडवते सभागृह, महाराष्ट्र हायस्कूल शेजारी, ना.म.जोशी मार्ग, करी रोड(प), मुंबई. याठिकाणी सायंकाळी ६ ते १० या वेळेत हा कार्यक्रम साजरा होणार आहे. सध्या संघाची २५ व्या वर्षाकडे (रौप्य महोत्सवी )वाटचाल सुरु आहे. त्यामुळे या निमित्ताने सदर कार्यक्रमात, पत्रकारितेत उल्लेखनीय कार्य केलेल्या महाराष्ट्रातील अनुभवी, ज्येष्ठ व श्रेष्ठ अशा २५ संपादक मंडळींचा यथोचित सत्कार सोहळा करण्यात येणार आहे. सन्मानचिन्ह- सन्मानपत्र- शाल व श्रीफळ देऊन, त्यांना “सन्मानित” केले जाणार आहे. तसेच पाच दिवाळी अंकाचा “विशेष सन्मान” करण्यात येणार आहे. सन्मान चिन्ह- सन्मानपत्र- शाल व श्रीफळ देऊन त्यांचाही “सन्मानित” केले जाणार आहे. या कार्यक्रमासाठी “ज्येष्ठ पत्रकार व दैनिक सागर चे संपादक सन्मा. डॉ. सुकृत खांडेकर, दैनिक लोकसत्ता चे संपादक ज्येष्ठ पत्रकार गिरीश कुबेर, सौ. जयश्री ताई अहिरराव (विश्वस्त- महिला विकास मंडळ, कुलाबा, मुंबई) यांच्यासह अन्य मान्यवरांची मुख्य उपस्थिती लाभणार आहे.
तेव्हा महाराष्ट्र मराठी मुक्त पत्रकार संघाच्या या कार्यक्रमासाठी सर्व पदाधिकारी यांच्यासह सभासद तसेच विविध माध्यम क्षेत्रातील पत्रकार आणि आपण आवर्जून उपस्थित राहावे, असे आवाहन संघाच्या वतीने करण्यात आले आहे.
