मुंबई (शांताराम गुडेकर) :’सांस्कृतिक वारसा लाभलेल्या महाराष्ट्रात लोककलेची संपन्न परंपरा आहे. संयुक्त महाराष्ट्र चळवळीत लोकशाहीर आणि लोककलावंतांनी विविध लोककलेच्या माध्यमातून समाजप्रबोधन आणि जनजागृतीचे अमूल्य कार्य केले. आजही महाराष्ट्राच्या सांस्कृतिक ओळखीचा हा अविभाज्य भाग आहे. तथापि, काळाच्या ओघात अनेक लोककला लोप पावत असताना कोकणातील काही गाव-खेड्यांत या कला अजूनही सणासुदीला जिवंत राहिल्या आहेत. त्या मर्यादित न ठेवता पारंपरिकतेबरोबर आधुनिकतेचा संगम साधून त्या अधिक व्यावसायिक बनाव्यात, यासाठी कोकणातील अनेक संस्था आणि कलावंत प्रयत्नशील आहेत.
बळीवंश कलामंच : कोकणातील लोककलेचा अभिमान
कोकणात नावलौकिक मिळवलेला बळीवंश कलामंच (ता. गुहागर, जि. रत्नागिरी) हा त्यापैकीच एक उल्लेखनीय कलामंच आहे. पारंपरिक लोककलांच्या संवर्धनासाठी सातत्याने कार्य करणाऱ्या श्री पाणबुडी देवी कलामंच, मुंबई यांच्या पुढाकाराने कोकणातील बहुप्रिय लोककला ‘नमन’ कलेच्या या मोसमातील शुभारंभाचा प्रयोग मुंबईत आयोजित करण्यात आला आहे.सोहळा मंगळवार, दि. ११ नोव्हेंबर २०२५ रोजी रात्री ८.३० वा. मा. दिनानाथ मंगेशकर नाट्यगृह, विलेपार्ले (पूर्व), मुंबई येथे रंगणार आहे
‘नमन लोककला गौरव पुरस्कार’ आणि ‘भजन सम्राट पुरस्कार’ जाहीर
कार्यक्रमादरम्यान संदीप तुकाराम सावंत आणि सतिश रामचंद्र जोशी यांना श्री पाणबुडी देवी, मुंबई पुरस्कृत स्व. शंकर (दादा) गोमाणे स्मृती प्रित्यर्थ ‘नमन लोककला गौरव पुरस्कार – २०२५’ प्रदान करण्यात येणार आहे. तसेच अनंत अशोक शेनॉय यांना स्व. शंकर (दादा) गोमाणे स्मृती प्रित्यर्थ ‘भजन सम्राट पुरस्कार – २०२५’ ने सन्मानित करण्यात येणार आहे.
नवोदित कलावंत सागर डावल यांची नवी कलाकृती — “संस्कार”
या कार्यक्रमात नवोदित नमन कलावंत शिवश्री सागर बबन डावल यांनी लिहिलेल्या “संस्कार” या नवीन वगनाट्य कलाकृतीचे प्रथम सादरीकरण होणार आहे. सागर डावल यांनी अल्पावधीत अनेक वगनाट्ये लिहून नमनकलेत आपले स्वतंत्र स्थान निर्माण केले आहे. समाजप्रबोधनपर विषयांवर त्यांच्या कलाकृती सतत वेगवेगळे सामाजिक संदेश देतात.
मुंबईकर कोकणवासीयांना आवाहन
संयोजकांनी आवाहन केले आहे की, अथक परिश्रमपूर्वक साकारलेल्या या नमन प्रयोगाला कोकणवासीय मुंबईकरांनी मोठ्या संख्येने उपस्थित राहावे.अधिक माहितीसाठी संपर्क:
📞 दिपक कारकर – ९९३०५८५१५३
📞 रमेश भेकरे – ९५९४३५२८६३
📞 संतोष घाणेकर – ९८३३६८९६४२
📞 रमेश कोकमकर – ८८५०४२२७११
