तळमावले/वार्ताहर : पाटण तालुक्यातील डाकेवाडी (काळगांव) येथील डाॅ.संदीप डाकवे आणि सौ.रेश्मा डाकवे या दाम्पत्यांच्याकडून नेहमी सामाजिक बांधिलकी जपणारे उपक्रम राबवले जातात. डाकेवाडी येथे तीव्र पाणीटंचाई होत असल्यामुळे उन्हाळा आला की लोक हवालदिल होतात. यावर मार्ग काढत गावातील काही ग्रामस्थांनी खाजगी जागेत असलेल्या विहीरीतील गाळ काढणे, रुंदीकरण आणि बांधकाम करणे इ. प्रकारची कामे श्रमदानातून करण्याचा निर्णय घेतला आहे. यामधून गावाच्या पाण्याचा प्रश्न काही अंशी सुटणार आहे. यामध्ये अनेक लोक उत्स्फुर्तपणे श्रमदान करत आहेत. अनेकांनी आर्थिक योगदान दिले आहे. यात आपलाही खारीचा वाटा असावा या हेतूने डाॅ.संदीप डाकवे आणि सौ.रेश्मा डाकवे यांनी आपली मुले चि.स्पंदन आणि कु.सांची यांच्या वाढदिवसानिमित्त तसेच अक्षरगणेशा उपक्रमातून रु.5,000/- देत खारीचा वाटा उचलला आहे.
स्पंदन-सांची कडून गावच्या पाण्यासाठी खारीचा वाटा
गेल्या 9 वर्षापासून चि.स्पंदन आणि गत 2 वर्षापासून कु.सांची हिच्या प्रत्येक वाढदिवसाला विधायक उपक्रम राबवून समाजाप्रती योगदान देण्याचा प्रयत्न केला आहे.
गावातील पाण्याचे दुर्भिक्ष्य संपवण्याच्या प्रयत्नात आपले काहीतरी योगदान असावे या उदात्त भावनेतून गयाबाई डाकवे, भरत डाकवे, गौरी डाकवे, संदीप डाकवे, रेश्मा डाकवे, पौर्णिमा डाकवे, प्रथमेष डाकवे आणि कुटूंबियांनी यांनी स्पंदनच्या दहाव्या व सांचीच्या तिसऱ्या वाढदिवसाचे औचित्य साधत रु. 5,000 देत खारीचा वाटा उचलला आहे. विशेष म्हणजे गावात तुकाराम बीजेनिमित्त डाकेवाडी प्रिमीयर लिग पर्व-3 रे आयोजन केले होते. यात स्पंदन सांची सुपरस्टार ला उपविजेतेपद व रोख पारितोषीक मिळाले होते. हे पारितोषिक डाकवे कुटूंबियांनी स्वतःसाठी न वापरता पाण्यासाठी जलदान म्हणून देण्यात येणार आहे. या कृतीचे कौतुक होत आहे.
यापूर्वी सांचीच्या बारशानिमित्त विविध क्षेत्रातील 13 महिलांचा नारी रत्न पुरस्काराने सन्मान, बोरन्हाण समारंभाला महिलांना प्रेरणादायी पुस्तकांचे वाटप, पुस्तकांचं झाड, कॅलिग्राफीतून अक्षरसंस्कार इ.उपक्रम राबवले आहेत.
कु.सांची रेश्मा संदीप डाकवे हिच्या नावाने ठेवपावती ठेवली असून या ठेवपावतीच्या व्याजाच्या रकमेतून प्रतिवर्षी न्यू इंग्लिश स्कूल काळगांव मध्ये इ.10 वी मध्ये मुलींमध्ये प्रथम येणाऱ्या विद्यार्थिनीस स्व.राजाराम डाकवे (तात्या) पारितोषिक देण्यात येते. रोख रक्कम रु.1,000/-, सन्मानपत्र आणि पुस्तक असे या पारितोषिकाचे स्वरुप आहे. गतवर्षी कुमाळ येथील सानिका पाटील यांना हे पारितोषिक दिले होते तर यंदा वैष्णवी नितीन पाटील यांना देण्यात येणार आहे.
चौकट : पालकमंत्री ना. शंभूराज देसाई यांचेकडून सांचीला शुभेच्छा
पालकमंत्री ना. शंभूराज देसाई यांनी कु. सांची रेश्मा संदीप डाकवे हिस शुभेच्छा पत्र पाठवून शुभेच्छा दिल्या आहेत. वाढदिवसानिमित्त डाकवे परिवाराने राबवलेल्या विविध सामाजिक उपक्रमांचे कौतुक केले आहे.
RELATED ARTICLES