नवी मुंबई : महाराष्ट्र शासनाच्या उच्च व तंत्रशिक्षण विभाग, ग्रंथालय संचालनालय महाराष्ट्र राज्य मुंबई, जिल्हा ग्रंथालय अधिकारी कार्यालय ठाणे, ठाणे जिल्हा ग्रंथालय संघ आणि प्रा. माणिकराव कीर्तने वाचनालय वाशी नवी मुंबई यांच्या संयुक्त विद्यमाने दि. 28 व 29 डिसेंबर 2025 रोजी वाशी से.6 येथे साहित्य मंदिर सभागृहात ‘ठाणे ग्रंथोत्सव – 2025’ साजरा होत असून यामधील विविध कार्यक्रमांच्या माध्यमातून तसेच ग्रंथ प्रदर्शनातून साहित्य रसिकांना पर्वणी उपलब्ध होणार आहे.
रविवार, दि. 28 डिसेंबर 2025 रोजी सकाळी 10.00 वाजता माजी ग्रंथालय संचालक श्री. मो.भु.मेश्राम यांच्या शुभहस्ते, सुप्रसिध्द साहित्यिक श्री. राजीव श्रीखंडे यांच्या अध्यक्षतेखाली ग्रंथोत्सवाचा शुभारंभ होणार असून याप्रसंगी ठाणे जिल्हाधिकारी डॉ. श्रीकृष्ण पांचाळ, ग्रंथालय संचालक श्री.अ.मा.गाडेकर, कोकण विभागीय ग्रंथालय संघ अध्यक्ष श्री. दिलीप कोरे, प्रा. माणिकराव कीर्तने वाचनालयाचे अध्यक्ष श्री. सुभाष कुलकर्णी, साहित्य परिषदेचे उपाध्यक्ष कवी श्री. अरुण म्हात्रे व ठाणे जिल्हा ग्रंथालय संघाचे अध्यक्ष श्री. चांगदेव काळे आदी मान्यवर विशेष अतिथी म्हणून उपस्थित राहणार आहेत. जिल्हा ग्रंथालय अधिकारी श्री. प्रशांत पाटील हे ठाणे ग्रंथोत्सवाचे निमंत्रक आहेत.
शुभारंभापूर्वी सकाळी 8 वाजता नवी मुंबई महानगरपालिकेचे अतिरिक्त आयुक्त श्री. सुनिल पवार यांच्या शुभहस्ते ‘ग्रंथदिंडी’ काढली जाणार असून शुभारंभ कार्यक्रमानंतर सकाळी 11 ते 12 यावेळेत ‘कृत्रिम बुध्दीमत्ता आणि ग्रंथालये’ या विषयावर लोकमतचे माजी संपादक श्री. सुकृत खांडेकर, गणितज्ञ डॉ. विवेक पाटकर व श्रीम. निर्मल सामंत प्रभावळक परिसंवादात सहभागी होणार आहेत.
त्यानंतर ‘पुस्तकवाल्यांचे वाचनवेड’ या विषयावरील परिसंवादात सुप्रसिध्द साहित्यिक श्री. गणेश मतकरी, श्री. पंकज भोसले व श्री. मकरंद जोशी ‘पुस्तक गप्पा’ मारणार आहेत. दुपारी 3 ते 5 या वेळेत शासन परिपत्रकांची अंमलबजावणी आणि ग्रंथालय पदाधिकारी व ग्रंथपाल यांचे मनोगत आयोजित करण्यात आले आहे.
ठाणे ग्रंथोत्सवाच्या दुस-या दिवशी ‘वाचन संस्कृती: काल, आज व उद्या’ या परिसंवादात श्री. अरविंद पाटकर, श्री. किरण येले, श्री.अनंत देशमुख आदी नामवंत साहित्यिक विचार प्रकट करणार आहेत. सकाळी 11.30 ते 01.00 यावेळेत श्री. संदीप जंगम ‘गोष्ट महाराष्ट्राची’ या संहितेचे अभिवाचन करणार आहेत.
यंदाचे वर्ष कविवर्य नारायण सुर्वे यांचे जन्मशताब्दी वर्ष असल्याने सुप्रसिध्द कवी श्री. अरुण म्हात्रे यांच्या अध्यक्षतेखाली दुपारी 3 ते 4.30 या वेळेत आयोजित ‘काव्यांजली या विशेष कवी संमेलनात नामवंत कवी श्री. साहेबराव ठाणगे, श्री. गीतेश शिंदे, श्री. रविंद्र पाटील, श्री. आदित्य दवणे, श्री. मोहन काळे, श्रीम. मानसी जोशी, श्री. नारायण लांडगे पाटील सहभागी होणार आहेत. सायं. 4.30 ते 5.30 या वेळेत श्री. सुनिता रामचंद्र, श्रीम. सुप्रिया हळबे, श्री. दिलीप जांभळे हे गजलकार ‘गजलसंध्या’ सादर करणार आहेत.
सायं. 6 वाजता ठाणे जिल्ह्रयातील आदर्श ग्रंथपाल व उत्कृष्ट वाचक यांचा विशेष सत्कार केला जाणार आहे. यामध्ये श्री. चांगदेव काळे, श्री. विद्याधर ठाणेकर, श्री. विनायक गोखले, श्री. सुभाष कुलकर्णी आदी वाचन संस्कृतीसाठी अथक कार्यरत असणा-या मान्यवरांना सन्मानित करण्यात येणार आहे.
दि. 28 व 29 डिसेंबर या दोन दिवशी संपन्न होणा-या ‘ठाणे ग्रंथोत्सव – 2025’ मध्ये साहित्य रसिकांनी मोठया संख्येने सहभागी व्हावे असे आवाहन ग्रंथोत्सव समन्वय समितीचे अध्यक्ष श्री. प्रशांत पाटील व सदस्य नवी मुंबई महानगरपालिका जनसंपर्क अधिकारी श्री. महेंद्र कोंडे, शिक्षण अधिकारी श्री. अशोक कडूस, प्रकाशक संघटनेचे सदस्य श्री. सुमित लांडे, ठाणे जिल्हा ग्रंथालय संघाचे अध्यक्ष श्री. चांगदेव काळे, साहित्य परिषदेचे उपाध्यक्ष श्री. अरुण म्हात्रे, प्रा.माणिकराव कीर्तने वाचनालयाचे अध्यक्ष श्री. सुभाष कुलकर्णी आणि सर्व संयोजन समितीच्या वतीने करण्यात येत आहे.
