कराड(प्रताप भणगे) : लोकशाहीतील कटुता, आरोप-प्रत्यारोप आणि तिखट टीकांच्या वातावरणात कराड शहराने लोकशाहीचे एक अनोखे आणि आदर्श मॉडेल देशासमोर उभे केले आहे. कराड नगरपरिषद नगराध्यक्षपदासाठीच्या सार्वत्रिक निवडणुकीतले सर्व ९ उमेदवार एकाच व्यासपीठावर येऊन एकोप्याचा संदेश देत इतिहास रचला.
१) १०० टक्के उपस्थिती — अनोखी घटना
यापूर्वीही कराडमध्ये असे कार्यक्रम झाले असले तरी सर्व उमेदवारांची १००% उपस्थिती नोंदवणं ही दुर्मीळ आणि आश्चर्यचकित करणारी बाब. या व्यासपीठावर सर्व उमेदवारांनी शांततेने आणि सकारात्मकतेने हजेरी लावली.
२) व्हिजन मांडताना कुठेही टीका नाही, आरोप नाही
शहराच्या विकासासाठीच्या योजना, व्हिजन आणि भविष्यातील दिशा सर्वांना एकसमानपणे मांडण्याची संधी मिळाली. लक्षवेधी बाब म्हणजे कुठल्याही उमेदवाराने दुसऱ्यावर अपशब्द, टीका किंवा आरोपांचा वापर केला नाही—ही लोकशाहीतील दुर्मिळ आणि प्रेरणादायी घटना.
३) कार्यक्रमानंतर ‘एक कराड’चा संदेश
कार्यक्रमानंतर सर्व उमेदवारांनी एकत्र हातात हात घालून हात उंचावले आणि एकत्रितपणे संदेश दिला—
“आम्ही स्पर्धक असलो, तरी कराडसाठी आम्ही एक आहोत.”
ही दृश्ये पाहून उपस्थित प्रेक्षकांनी दीर्घकाळ टाळ्यांचा कडकडाट केला.
कराडमध्ये एकमेकांविरोधात निवडणूक लढवत असतानाही उमेदवारांनी दाखवलेले ऐक्य, परस्परांबद्दलचा आदर आणि कराडच्या विकासाला प्राधान्य देणारा दृष्टिकोन—ही तीनही ‘अद्भुत’ आणि ‘कराडची परंपरा’ जपणारी वैशिष्ट्ये ठरली.
राजकीय संस्कृतीला नवी दिशा देणारा हा उपक्रम ‘हे फक्त कराडातच होऊ शकतं!’ अशीच प्रतिक्रिया शहरात उमटताना दिसली. हे फक्त कराड शहरातच घडू शकते अशी प्रतिक्रिया नागरिक देताना दिसत होते.
