नाशिक : येत्या सिंहस्थ कुंभमेळ्याच्या अनुषंगाने तपोवन परिसरातील साधुग्राम उभारणीचा प्रस्ताव शासनाने मांडला असून, त्यासाठी १,८०० झाडांची तोड करण्यात येणार आहे. या निर्णयाला पर्यावरणप्रेमींचा वाढता विरोध असताना, आता ज्येष्ठ अभिनेते सयाजी शिंदे यांनीही प्रत्यक्ष तपोवनात जाऊन पाहणी करत शासनाच्या भूमिकेवर कडक प्रहार केला आहे.
शिंदे यांनी तपोवनात उपस्थित नागरिक, कार्यकर्ते व पर्यावरणप्रेमींशी संवाद साधत झाडतोडीच्या निर्णयावर जोरदार नाराजी व्यक्त केली.
ते म्हणाले,
“नाशिककरांनी तपोवन वाचवण्यासाठी उभा केलेला लढा योग्य आहे. मी पूर्णपणे त्यांच्या बाजूने आहे. महाराष्ट्र सह्याद्री देवराईच्यावतीने हा संघर्ष आम्ही सर्वांनी पुढे नेणार आहोत. तपोवन वाचवा, नाशिक वाचवा!”
नाशिकमध्ये साधुग्राम उभारणीसाठी मोठ्या प्रमाणात होत असलेल्या झाडतोडीवर त्यांनी कठोर शब्दांत शासनाला प्रश्न केला.
“इथलं एकही झाड तुटता कामा नये. झाडं गेली तर नाशिककरांचं अतोनात नुकसान आहे. आपल्याच माणसाने आपल्यालाच फसवलं तर त्यांना आपलं कसं म्हणायचं? हे आपलं शासन आहे की इंग्रजांचं राज्य परत आलंय?”
राष्ट्रीय वृक्ष वडाच्या महत्त्वावर भाष्य करताना त्यांनी सरकारच्या दृष्टिकोनावरही ताशेरे ओढले.
“वडाचं झाड ५००-६०० प्रजातींचं घर आहे. प्रचंड प्रमाणात ऑक्सिजन देणारं हे झाड सरकारच्या नजरेत झुडूप म्हणून गणलं जातं, हीच आपली शोकांतिका,” असे त्यांनी म्हटले.
या मुद्द्यावर बोलताना त्यांनी थेट मंत्री गिरीश महाजन यांच्यावर बोट ठेवले.
“महाराष्ट्रात कुठेही झाड तुटू देऊ नका. झाडं म्हणजे आई-बाप. आई-बापावर कुणी हल्ला केला तर आम्ही गप्प बसत नाही. गिरीश महाजन, तुम्ही जबाबदार माणूस आहात—यावर तुमचं उत्तर काय? तुमची-माझी कुठलीच दुश्मनी नाही; आणि झाली तरी काही फरक पडत नाही,” अशी थेट चौकशी त्यांनी केली.
तपोवनातील झाडतोडीचा विषय आता अधिकच तापू लागला असून, गिरीश महाजनांवर वाढती जबाबदारी आणि जनमताचा दबाव दिसत आहे. पर्यावरणप्रेमींनी पुढील दिवसांत आंदोलन आणखी तीव्र करण्याचे संकेत दिले आहेत.
