कराड : एकीकडे वाढत्या उष्णतेमुळे धरणांच्या पाणीपातळीत घट होत असून पाणी बचतीचे आवाहन केले जात आहे, तर दुसरीकडे कराड बसस्थानक परिसरात पाणी वाया जात असल्याचे चित्र छायाचित्रातून दिसून येत आहे. सार्वजनिक ठिकाणी अशा प्रकारे पाण्याचा अपव्यय होत असल्यास त्याला आळा घालणार कोण, असा प्रश्न उपस्थित होत आहे.
पाणी हे जीवनावश्यक साधन असून त्याचा प्रत्येक थेंब महत्त्वाचा आहे. भविष्यात पाणीटंचाईची तीव्रता वाढू नये, यासाठी नागरिकांसह प्रशासनानेही पाणी बचतीला प्राधान्य देणे आवश्यक आहे. मात्र, कराड बसस्थानक परिसरातील या परिस्थितीकडे संबंधित विभागाने गांभीर्याने लक्ष देण्याची गरज आहे.
गळती असल्यास तातडीने दुरुस्ती करा!
बसस्थानक परिसरात पाणी गळतीमुळे किंवा अन्य कारणाने पाणी वाया जात असल्यास संबंधित अधिकाऱ्यांनी प्रत्यक्ष पाहणी करून त्याचे कारण शोधावे आणि तातडीने योग्य ती दुरुस्ती करावी. सार्वजनिक पाण्याचा अपव्यय रोखण्यासाठी नियमित तपासणी आणि देखभाल करणेही आवश्यक आहे.
पाणी वाचवा, भविष्य सुरक्षित करा!
पाणीटंचाईचे संकट टाळण्यासाठी केवळ नागरिकांना आवाहन करून चालणार नाही, तर सार्वजनिक ठिकाणी होणारा पाण्याचा अपव्यय रोखण्याची जबाबदारी प्रशासनानेही पार पाडली पाहिजे. कराड बसस्थानकातील या प्रकाराची संबंधित विभागाने दखल घेऊन तातडीने कार्यवाही करावी, अशी मागणी होत आहे.
