रोहा :
रोहा नगर परिषदेचा चेहरामोहरा बदलायचा असेल, विकासाची गती वाढवायची असेल आणि समृद्ध रोह्याचे स्वप्न साकार करायचे असेल, तर निर्धार करा विकासाचा आणि मतदान करा धनुष्यबाणाला,” अशा शब्दांत राज्याचे उपमुख्यमंत्री एकनाथ शिंदे यांनी मतदारांना आवाहन केले. नगराध्यक्षपदाच्या महायुतीच्या उमेदवार शिल्पा धोत्रे आणि त्यांच्या सहकाऱ्यांना प्रचंड बहुमताने विजयी करण्याचे आवाहनही त्यांनी या वेळी केले.
रोहा नगरपालिका निवडणुकीच्या प्रचारासाठी उपमुख्यमंत्री शिंदे रविवारी शहरात दाखल झाले होते. त्यांच्या रोड शोला जनतेचा उत्स्फूर्त प्रतिसाद मिळाला. शहरातील विविध भागांतून झालेल्या त्यांच्या स्वागतानंतर संपूर्ण रोड शोचा परिसर भगवामय झाल्याचे चित्र दिसत होते. मोठ्या प्रमाणावर झालेल्या घोषणाबाजीमुळे वातावरणात उत्साह उसळला होता. “रोह्यात बदल हवा… विकास हवा…” अशा घोषणा जनतेतून घुमत होत्या.
रोह्याच्या विकासासाठी शिवसेना कटिबद्ध असल्याचे सांगताना उपमुख्यमंत्री शिंदे म्हणाले, “रोह्याला विकास हवा आहे, अडथळे नाहीत. जेवढा निधी लागेल तेवढा आम्ही देऊ. रस्ते, शुद्ध पाणी, भुयारी गटार, रुग्णालय सुविधा, कुंडलिका नदी स्वच्छता आणि पायाभूत सुविधा उभारणी या विकासकामांना गती देऊ.”
त्यांनी सांगितले की आतापर्यंत रोह्यासाठी भरघोस निधी देण्यात आला असून पुढील काळात आणखी भरीव कामे करण्याचा निर्धार आहे.
राज्यात चर्चेत असलेल्या “मुख्यमंत्री लाडकी बहिण” योजनेबाबत कुणी काहीही म्हटले तरी ही योजना बंद होणार नसल्याचे त्यांनी ठामपणे सांगितले. “जनतेच्या जीवनात बदल घडवणाऱ्या योजनांना कुणी थांबवू शकत नाही. ही योजना बंद होणार नाही, हे मी स्पष्ट सांगतो”, असे शिंदे यांनी स्पष्ट केले.
रविवारी झालेला महायुतीचा रोड शो हा आतापर्यंतचा सर्वात मोठा असल्याचे बोलेल जाते. यावेळी शिवसेनेचे मंत्री भरत गोगावले, अलिबागचे आमदार महेंद्र दळवी तसेच महायुतीचे स्थानिक नेते, पदाधिकारी, महिला संघटना, युवक कार्यकर्ते आणि समर्थक मोठ्या संख्येने उपस्थित होते.
