प्रतिनिधी :
नवी मुंबई क्षेत्रात हवेतील धुळीचे प्रमाण नियंत्रणात आणण्यासाठी महापालिका आयुक्त डॉ. कैलास शिंदे यांनी विभागप्रमुखांच्या अढावा बैठकीत दिलेल्या निर्देशानुसार सर्व विभाग कार्यालय क्षेत्रात युध्दपातळीवर ठोस उपाययोजना करण्यात येत असून पहिल्या टप्प्यात मुख्य रस्त्यांवरील माती साफ करीत गोळा करुन वाहून नेण्यात येत आहे. त्याचप्रमाणे प्रक्रिया केलेल्या पाण्याने रस्ते धुवून घेण्यात येत आहेत.
याकरीता अतिरिक्त आयुक्त श्री.सुनिल पवार यांच्या मार्गदर्शनाखाली आठही विभाग कार्यक्षेत्रात शहर अभियंता श्री.शिरीष आरदवाड व घनकचरा व्यवस्थापन विभाग उपआयुक्त डॉ. अजय गडदे यांच्या नियंत्रणाखाली सखोल स्वच्छता करण्यात येत आहे. याकरिता विभागनिहाय अभियंते व स्वच्छता अधिकारी यांच्या माध्यमातून पथके तयार करुन सखोल स्वच्छतेची कार्यवाही केली जात आहे.
या अनुषंगाने आज बेलापूर विभागात अग्रोळी उड्डाणपूल ते कोकण भवन मार्ग, नेरुळ विभागात राजीव गांधी उड्डाणपूल ते पाम बीच मार्ग, वाशी विभागात से.31 वाशीगाव ते सिडको एक्झिबिशन सेंटर, तुर्भे विभागात शापुरजी पालनजी बांधकाम साईट ते से.10 सानपाडा, कोपरखैरणे विभागात कांचनगंगा सोसायटी ते से.2 पोलीस चौकी, घणसोली विभागात से.10 पाम बीच कॉर्नर ते साईबाबा मंदिर, ऐरोली विभागात गणपती तलावा शेजारील मुख्य रस्ता, दिघा विभागात ठाणे बेलापूर रोड ते रामनगर एमआयडीसी रोड अशाप्रकारे मुख्य रस्त्यांवरील रस्त्यांच्या कडेला साठलेली माती व्यवस्थित स्वच्छ करुन ती उचलून नेण्याची व त्याव्दारे हवेतील धूळ कमी करण्याची कार्यवाही करण्यात आली.
सखोल स्वच्छता मोहीमेत वायर ब्रशचा झाडू व फ्ल‍िपर मशीनव्दारे रस्त्यांच्या कडेला असलेली माती एकत्रीत केली जात असून ती लगेच उचलून घेतली जात आहे आणि स्वतंत्र वाहनाव्दारे ही माती वाहून नेली जात आहे. रस्त्यावरील माती व धूळ साफ केल्यानंतर यांत्रिकी वाहनाव्दारे व स्प्रिंकलर वाहनाव्दारे तसेच जेट स्प्रे वाहनाव्दारे पाणी मारुन रस्ता धुवून घेतला जात आहे. तसेच एनकॅपच्या डस्ट सप्रेसर (फॉगर्स) वाहनाव्दारे हवेत पाण्याचे फवारे मारुन हवेतील धूलीकण जमिनीवर बसतील अशी धूळ प्रतिबंधात्मक कार्यवाही केली जात आहे. रस्ते धुणे व हवेत पाण्याचे फवारे मारणे यासाठी अत्याधुनिक मलप्रक्रिया केंद्रातील शुध्द केलेले प्रक्रियाकृत सांडपाणी वापरले जात आहे.
या सोबतच आयुक्त डॉ.कैलास शिंदे यांनी आढावा बैठकीत दिलेल्या निर्देशानुसार बांधकाम साईट, दगडखाणी व सिमेंट निर्मितीचे आरएमसी प्लान्ट या ठिकाणच्या धूळ प्रदुषणावर नियंत्रण ठेवण्यासाठी विभाग कार्यालय पातळीवर विभाग अधिकारी यांच्या नियंत्रणाखाली दक्षता पथके प्रत्यक्ष भेट देउुन पाहणी करत आहेत. ही सखोल स्वच्छता मोहीम या पुढील काळातही प्रभावीपणे नियमित राबविली जाणार आहे.
