तळमावले/वार्ताहर : पाटण तालुक्यातील डाकेवाडी (काळगांव) येथील स्पंदन चॅरिटेबल ट्रस्ट महाराष्ट्र राज्य यांच्यावतीने विविध क्षेत्रात आदर्श असलेल्या आणि सामाजिक जडणघडणीसाठी उल्लेखनीय योगदान देत असलेल्या व्यक्ती आणि संस्था यांना राज्यस्तरीय प्राईड ऑफ स्पंदन ॲवार्ड या पुरस्काराने गौरवण्यात येते. या पुरस्कारासाठी प्रस्ताव पाठविण्याचे आवाहन ट्रस्टचे संस्थापक अध्यक्ष संदीप डाकवे यांनी केले आहे. समाजासाठी अविरतपणे झटणाऱ्या सर्वसामान्यांमधील आदर्श व्यक्ती, संस्था, ट्रस्ट यांना पुरस्काराने सन्मानित करुन त्यांचे कार्य समाजापुढे आणण्यासाठी हे पुरस्कार देण्यात येतात. सदर पुरस्कार सोहळयाचे हे सातवे वर्ष आहे. याच कार्यक्रमात स्पंदन जीवन गौरव, उत्कृष्ट दिवाळी अंक स्पर्धा, सेल्फी विथ गुढी स्पर्धा, स्व.राजाराम डाकवे (तात्या) राज्यस्तरीय चित्रकला स्पर्धा, निबंध स्पर्धा, राज्यस्तरीय स्व.राजाराम डाकवे (तात्या) साहित्य पुरस्कार, स्व.राजाराम डाकवे (तात्या) पारितोषिक इत्यादींचाही सन्मान केला जाणार आहे.
डाकेवाडी सारख्या दुर्गम भागात राहूनही संदीप डाकवे आणि त्यांचे सहकारी यांनी स्पंदन चॅरिटेबल ट्रस्टच्या माध्यमातून आतापर्यंत शेकडो नावीण्यपूर्ण उपक्रम राबवून आपल्या कामाची कर्तृत्वमुद्रा समाजमनावर उमटवली आहे. या कामाची दखल घेत स्पंदन चॅरिटेबल ट्रस्टला अनेक पुरस्कारांनी सन्मानित केले आहे. विविध क्षेत्रातील मान्यवरांनी प्रत्यक्ष तसेच शुभसंदेश देवून ट्रस्टच्या कार्याचा गौरव केला आहे.
तरी सदर पुरस्कारासाठी इच्छुक व्यक्ती, संस्था, ट्रस्ट यांनी आपल्या नामांकनासह आपल्या क्षेत्रातील आपण केलेल्या कार्याचे फोटो, वृत्तमानपत्रातील बातम्यांची कात्रणे इ. साहित्याचे प्रस्ताव मंगळवार दि.30 सप्टेंबर, 2025 पर्यंत संदीप राजाराम डाकवे ‘राजनंदा प्राईड अपार्टमेंट’, फ्लॅट नं.8, होली फॅमिली काॅन्व्हेंट स्कुलच्या पाठीमागे, सैदापूर विद्यानगर, ता.कराड, जि.सातारा. 415124 येथे पोस्टाने अथवा कुरियरने पाठवावेत. आलेल्या नामांकनामधून निवड समितीने निवडलेल्या पुरस्कार्थींना एका भव्यदिव्य व शानदार कार्यक्रमात दिग्ग्ज मान्यवर, सेलिब्रिटी यांच्या हस्ते पुरस्कार देवून सन्मानित करण्यात येईल.
*चौकटीत :*
‘स्पंदन’ पुरस्काराने दिग्गजांचा सन्मान :
नीलकंठ खाडीलकर (पत्रकारिता), पद्मश्री डाॅ.विजय शहा (वैद्यकीय), खा.श्रीनिवास पाटील (राजकीय), ॲड.जनार्दन बोत्रे (सहकार), प्राचार्य डाॅ.यशवंत पाटणे (साहित्य), श्री गुरु श.ब्र.प्र.108 डाॅ.नीलकंठ धारेश्वर महाराज (अध्यात्मिक) यांना स्पंदन जीवन गौरव पुरस्काराने सन्मानित करण्यात आले आहे. याचे स्वरुप रोख रक्कम रु.5,000/-, मानपत्र, सन्मानचिन्ह, शाल आणि पुस्तक असे आहे.
याशिवाय अभिनेते किरण माने, अभिनेत्री अश्विनी महांगडे, लावणीसम्राज्ञी विजया पालव, महाराष्ट्र केसरी पै.आप्पासाहेब कदम, शिवव्याख्याते प्रा.डाॅ.अरुण घोडके, अभिनेत्री प्राजक्ता शिसोदे, अभिनेते रवि साळुंखे, अभिनेता सुयष शिर्के, अभिनेत्री सुनंदा शेंडे, अभिनेत्री डाॅ.सीमा पाटील, अभिनेते व लेखक सचिन पाटील, उद्योजक सर्जेराव यादव, ह.भ.प.विजय महाराज रामिष्टे, मुख्यमंत्री सहायता निधीचे कक्षप्रमुख मंगेश चिवटे, पार्श्वगायिका कविता राम, दिग्दर्शक विठ्ठल डाकवे, अभिनेते पंकज काळे, विश्वविक्रमवीर गिर्यारोहक कु.अन्वी घाटगे यांना राज्यस्तरीय प्राईड ऑफ स्पंदन ॲवार्ड या पुरस्काराने सन्मानित केले आहे.
