प्रतिनिधी : शिक्षण आयुक्त सचिन्द्र प्रताप सिंह यांनी 29 नोव्हेंबर 2025 रोजी शैक्षणिक वर्ष 2024-25 मधील संच मान्यतेनुसार अतिरिक्त ठरलेल्या शिक्षकांच्या समायोजनास तात्पुरती स्थगिती दिली आहे. सध्या शैक्षणिक वर्ष 2025-26 ची संच मान्यता प्रक्रिया सुरू असून, ही प्रक्रिया पूर्ण झाल्यानंतर दोन्ही वर्षांत अतिरिक्त ठरलेल्या शिक्षक व शिक्षकेतर कर्मचाऱ्यांचे समायोजन एकत्रितपणे केले जाणार आहे.
तत्पुरती स्थगिती मिळाल्याने शिक्षकांना दिलासा मिळाला असला तरी, हे केवळ “आजचे मरण उद्यावर ढकलले” असल्याची प्रतिक्रिया शिक्षक संघटनांकडून व्यक्त करण्यात येत आहे.
15 मार्च 2024 चा संच मान्यतेचा अन्यायकारक शासन निर्णय रद्द होत नाही, तोपर्यंत लढा सुरू ठेवावा, असे आवाहन शिक्षक संघटनांनी केले आहे. राज्यातील सर्व शिक्षक संघटना 5 डिसेंबर 2025 रोजी शाळा बंद आंदोलनात सहभागी होणार असून, या आंदोलनातील प्रमुख मागणी टीईटी सक्ती रद्द करा आणि 15 मार्च 2024 चा शासन निर्णय रद्द करा हीच आहे.
सर्व शिक्षक व शिक्षकेतर कर्मचाऱ्यांना आवाहन करताना शिक्षक भारतीचे कार्याध्यक्ष सुभाष सावित्री किसन मोरे यांनी स्पष्ट केले —
“अतिरिक्त शिक्षकांचे समायोजन थांबले आहे, पण लढा थांबलेला नाही. लढेंगे, जितेंगे!”
