मुंबई : मुंबई, ठाणे आणि राज्यातील अनेक शहरांमध्ये वाहतूक नियमभंग करणाऱ्या वाहनांवर कॅमेऱ्यांच्या माध्यमातून काही सेकंदांत कारवाई केली जाते. वाहन क्रमांक स्कॅन करून ई-चलन पाठविण्याची व्यवस्था प्रभावीपणे कार्यरत आहे. मात्र, याच रस्त्यांवरील जीवघेणे खड्डे प्रशासनाच्या नजरेत का येत नाहीत, असा प्रश्न आता सोशल मीडियावर जोरदार उपस्थित केला जात असून ही पोस्ट मोठ्या प्रमाणात व्हायरल होत आहे.
नागरिकांचे म्हणणे आहे की, जागोजागी बसविण्यात आलेले कॅमेरे वाहन क्रमांक अचूक ओळखतात, नियमभंग करणाऱ्यांवर तत्काळ दंड आकारला जातो. मग त्याच यंत्रणेच्या माध्यमातून रस्त्यांवरील मोठे खड्डे, खराब रस्ते किंवा धोकादायक ठिकाणे ओळखून संबंधित विभागाला तत्काळ सूचना का दिल्या जात नाहीत?
पावसाळ्यात खड्ड्यांमुळे दुचाकीस्वार घसरून पडणे, गंभीर जखमी होणे किंवा काही वेळा जीव गमावण्याच्या घटनाही घडतात. अशा दुर्घटनांनंतर संबंधित यंत्रणांची जबाबदारी निश्चित होणार का, असा सवालही नागरिकांकडून उपस्थित केला जात आहे.
सोशल मीडियावर व्हायरल होत असलेल्या या चर्चेत नागरिकांनी स्पष्टपणे नमूद केले आहे की, नियमांचे पालन नागरिकांनी करणे जितके आवश्यक आहे, तितकेच सुरक्षित आणि खड्डेमुक्त रस्ते उपलब्ध करून देणे ही संबंधित प्रशासनाची जबाबदारी आहे.
मुंबई, ठाणे तसेच महाराष्ट्रातील वाहतूक विभाग, सार्वजनिक बांधकाम विभाग, महानगरपालिका, स्थानिक स्वराज्य संस्था आणि महाराष्ट्र पोलीस प्रशासन यांनी या प्रश्नाकडे गांभीर्याने लक्ष देऊन रस्त्यांवरील खड्डे तातडीने बुजवावेत, अशी सर्वसामान्य नागरिकांची मागणी आहे.
