कराड : मुंढे विमानतळाजवळील महामार्गाच्या कडेला मोठ्या प्रमाणात कचरा साचल्याचे चित्र समोर आले आहे. प्लास्टिकच्या पिशव्या, खाद्यपदार्थांचे पॅकिंग, घरगुती कचरा आणि इतर घाण रस्त्यालगत पसरल्याने परिसराचे विद्रुपीकरण होत आहे.
महामार्गावरून दररोज मोठ्या प्रमाणात वाहनांची ये-जा सुरू असते. अशा वर्दळीच्या ठिकाणी कचऱ्याचा ढीग साचल्याने दुर्गंधी, अस्वच्छता आणि आरोग्याचा प्रश्न निर्माण होण्याची शक्यता आहे. कचऱ्यात भटक्या कुत्र्यांचा वावरही वाढल्याचे चित्र दिसत आहे.
कराड परिसरातील महामार्गालगत कचरा टाकण्याची समस्या यापूर्वीही चर्चेत आली आहे. कराडमध्ये कचरा व्यवस्थापनासाठी विविध उपक्रम राबविले जात असल्याचे केंद्र सरकारनेही नमूद केले आहे.
मुंढे विमानतळ परिसरातील हा कचरा तातडीने हटवून नियमित स्वच्छता करावी, तसेच महामार्गालगत कचरा टाकणाऱ्यांवर कारवाई करावी, अशी मागणी नागरिकांतून होत आहे.
