मुंबई : चेंबूर परिसरात मुंबई महानगरपालिका आणि मुंबई पोलिसांच्या संयुक्त कारवाईदरम्यान चर्मकार समाजातील महिलेच्या स्टॉलवर करण्यात आलेल्या कारवाईचा तीव्र निषेध व्यक्त करण्यात आला आहे. या कारवाईदरम्यान टाऊन वेंडिंग कमिटीच्या सदस्या श्रीमती आशा आक्षे यांच्याशी पोलिसांकडून धक्काबुक्की व मारहाण झाल्याचा आरोप करण्यात आला आहे.
चर्मकार गट ‘एक अंगार’ यांच्या स्टॉलवर झालेल्या कारवाईच्या निषेधार्थ बुधवार, १९ ऑगस्ट रोजी ईस्ट चेंबूर बीएमसी कार्यालयासमोर निषेध आंदोलन करण्यात येणार असून, समाजबांधवांनी मोठ्या संख्येने उपस्थित राहावे, असे आवाहन करण्यात आले आहे.
या घटनेबाबत प्रतिक्रिया व्यक्त करताना आंदोलकांनी सांगितले की, एखाद्या गंभीर गुन्ह्यातील आरोपीवर केली जाते त्यापेक्षाही कठोर पद्धतीने एका महिला चर्मकार विक्रेत्यावर कारवाई करण्यात आली. छोट्या स्टॉलच्या माध्यमातून आपल्या कुटुंबाचा उदरनिर्वाह करणाऱ्या गरीब व कष्टकरी विक्रेत्यांवर अशा प्रकारची कारवाई करणे अन्यायकारक असल्याचे त्यांनी म्हटले.
“महानगरपालिका आणि पोलिसांनी कारवाई करताना गरीब मराठी व कष्टकरी विक्रेत्यांचा विचार करावा. परप्रांतीय किंवा बेकायदा व्यवसाय करणाऱ्यांवर कारवाई करायची असेल तर नियमानुसार करावी; मात्र कुटुंबाचा उदरनिर्वाह छोट्या स्टॉलवर अवलंबून असलेल्या कष्टकरी महिलांना लक्ष्य करू नये,” अशी मागणी आंदोलकांनी केली.
टाऊन वेंडिंग कमिटीच्या सदस्या असलेल्या आशा आक्षे यांच्याशी झालेल्या कथित धक्काबुक्की व मारहाणीची प्रशासनाने गंभीर दखल घेऊन संबंधितांवर योग्य ती कारवाई करावी, तसेच फेरीवाला धोरणानुसार पात्र विक्रेत्यांना संरक्षण द्यावे, अशी मागणी करण्यात आली आहे.
या प्रकरणी प्रशासनाने वस्तुनिष्ठ चौकशी करून गरीब व कष्टकरी विक्रेत्यांना न्याय द्यावा, अशी अपेक्षा चर्मकार समाज आणि फेरीवाला संघटनांकडून व्यक्त होत आहे.
