लंडन : भारतीय महिला क्रिकेट संघाने क्रिकेटची पंढरी म्हणून ओळखल्या जाणाऱ्या लॉर्ड्स मैदानावर इतिहास रचत इंग्लंडचा 270 धावांनी पराभव केला. हरमनप्रीत कौरच्या नेतृत्वाखाली भारताने लॉर्ड्सवरील पहिल्याच महिला कसोटी सामन्यात दिमाखदार विजय मिळवत भारतीय महिला क्रिकेटच्या इतिहासात सुवर्णाक्षरांनी नोंद होईल असा पराक्रम केला.
लॉर्ड्सच्या 142 वर्षांच्या इतिहासात प्रथमच महिला कसोटी सामना खेळवण्यात आला आणि या ऐतिहासिक सामन्याची विजेती ठरण्याचा मान भारतीय संघाने पटकावला. भारताने इंग्लंडसमोर विजयासाठी 457 धावांचे आव्हान ठेवले होते. मात्र, चौथ्या आणि अखेरच्या दिवशी इंग्लंडचा दुसरा डाव 186 धावांत संपुष्टात आला आणि भारताने 270 धावांनी दणदणीत विजय मिळवला.
पहिल्या डावात भारताने 285 धावा केल्या. त्यानंतर वेगवान गोलंदाज क्रांती गौड हिने भेदक मारा करत इंग्लंडच्या पहिल्या डावात पाच बळी घेतले. तिच्या प्रभावी गोलंदाजीमुळे इंग्लंडचा डाव अवघ्या 170 धावांत आटोपला आणि भारताला 115 धावांची महत्त्वपूर्ण आघाडी मिळाली.
दुसऱ्या डावात भारताने 341 धावांवर डाव घोषित केला. यास्तिका भाटिया हिने शानदार 113 धावांची शतकी खेळी करत भारताची धावसंख्या भक्कम केली. त्यामुळे इंग्लंडसमोर 457 धावांचे अशक्यप्राय लक्ष्य उभे राहिले.
इंग्लंडने दुसऱ्या डावात काहीसा प्रतिकार करण्याचा प्रयत्न केला. एमी जोन्स आणि सोफी एक्लेस्टोन यांनी अर्धशतके झळकावली. मात्र भारतीय गोलंदाजांसमोर त्यांचा निभाव लागला नाही. इंग्लंडचा संपूर्ण संघ 186 धावांत बाद झाला आणि भारताने ऐतिहासिक विजयावर शिक्कामोर्तब केले.
या सामन्यात क्रांती गौडने एकूण सात, तर स्नेह राणाने सहा बळी घेत भारतीय गोलंदाजीची ताकद दाखवून दिली. इंग्लंडच्या पहिल्या डावात पाच बळी घेणाऱ्या क्रांती गौड आणि दुसऱ्या डावात शतक झळकावणाऱ्या यास्तिका भाटिया यांची नावे आता लॉर्ड्सच्या ऐतिहासिक सन्मान फलकावर कायमची कोरली गेली आहेत.
विशेष म्हणजे, लॉर्ड्सवर पहिला पुरुष कसोटी सामना 1884 मध्ये ऑस्ट्रेलिया आणि इंग्लंड यांच्यात झाला होता. त्यानंतर तब्बल 142 वर्षांनी येथे पहिला महिला कसोटी सामना रंगला आणि त्या ऐतिहासिक सामन्यात भारतीय महिलांनी दणदणीत विजय मिळवत जागतिक क्रिकेटमध्ये नवा इतिहास घडवला. हा विजय भारतीय महिला क्रिकेटसाठी अभिमानाचा आणि भारतीय क्रिकेट इतिहासातील एक अविस्मरणीय सुवर्णक्षण ठरला.
