कराड(प्रताप भणगे) : कराड परिसरात घरगुती एलपीजी गॅस सिलिंडरची वाहतूक करणारी एक गाडी नंबर प्लेटविना सार्वजनिक रस्त्यावर धावत असल्याचे निदर्शनास आल्याने नागरिकांनी आश्चर्य व्यक्त केले आहे. नंबर प्लेट नसलेल्या वाहनाची सार्वजनिक रस्त्यावर वाहतूक ही वाहतूक नियमांचे उल्लंघन मानली जाते. त्यातही एलपीजी गॅस सिलिंडरसारख्या ज्वलनशील वस्तूंची वाहतूक करताना सुरक्षा नियमांचे काटेकोर पालन करणे आवश्यक असते.
या प्रकाराची माहिती संबंधित प्रशासन आणि वाहतूक विभागाला देण्यात आल्याचे सांगण्यात येत आहे. वाहनाची पडताळणी करून आवश्यक कागदपत्रे, नोंदणी, परवाने तसेच वाहतूक नियमांचे पालन झाले आहे की नाही, याची सखोल चौकशी करण्यात यावी आणि नियमभंग आढळल्यास संबंधितांवर योग्य ती कारवाई करावी, अशी मागणी नागरिकांकडून करण्यात येत आहे.
दरम्यान, संबंधित वाहनाची नोंदणी, वैध परवाने आणि वाहतुकीसाठी आवश्यक नियमांचे पालन झाले आहे की नाही, याबाबत अधिकृत माहिती अद्याप समोर आलेली नाही. त्यामुळे प्रशासनाच्या चौकशीनंतरच या प्रकरणाचे नेमके स्वरूप स्पष्ट होणार आहे.
