मुंबई : चेंबूरमधील प्रसिद्ध शिल्पकार गुरुदेव मांद्रेकर यांनी खास महाशिवरात्रीसाठी पहिल्यांदाच ७ फुट उंचीची भगवान शंकराची रेखीव,
सुबक अशी अर्धमूर्ती साकारली आहे.या शिवमूर्तीची रसायनी पाताळगंगा येथील पुरातन शिव मंदिरात महाशिवरात्र कार्यक्रमात स्थापना केली जाणार आहे.
अवघ्या २० दिवसांत फायबर स्टोनची वॉटरप्रूफ अशी ही मूर्ती साकारण्याची किमया शिल्पकार मांद्रेकर यांनी केली आहे.चेंबूरच्या घाटला गाव मैदान परिसरातील कारखान्यात साकारलेली ही मूर्ती पाहण्यासाठी परिसरातील नागरिक गर्दी करताना दिसत आहेत.मांद्रेकर हे साईबाबा भक्त असून साईबाबा मूर्ती स्पेशालिस्ट म्हणून ओळखले जातात.ते गेल्या ५० वर्षांपासुन विविध देवदेवतांच्या आणि महापुरुषांच्या मूर्ती बनवत आहेत.विशेष म्हणजे शिल्पकार मांद्रेकर हे दर गुरुवारी स्वखर्चाने आपल्या मूर्ती बनविण्याच्या कारखान्यात साईबाबांचा भंडारा आयोजित करून मोफत प्रसाद वाटप करत असतात.
