मुंबई : बीएमसी जी-नॉर्थ वॉर्डच्या घनकचरा व्यवस्थापन (SWM) विभागातील ज्युनियर ऑफिसर संदीप मटकर आणि पर्यवेक्षक रत्नकांत बी. सावंत यांनी आज शारदाश्रम सोसायटीला भेट देऊन कचरा व्यवस्थापनाच्या प्रयत्नांची पाहणी केली. शारदाश्रम हा मोठ्या प्रमाणात कचरा निर्माण करणारा (Bulk Waste Generator) असल्याने कचऱ्याचे स्रोतावरच वर्गीकरण आणि व्यवस्थापन करणे बंधनकारक असल्याचे त्यांनी नमूद केले.
सोसायटीत ओल्या व सुक्या कचऱ्याचे वर्गीकरण आणि प्रक्रिया सुरू असल्याची माहिती समितीने दिली. यावेळी अधिकाऱ्यांनी बीएमसीच्या धोकादायक कचरा संकलनासाठी सुरू केलेल्या नव्या उपक्रमाची माहिती दिली तसेच आरनिसर्ग फाउंडेशनचे मोबाईल अॅप्लिकेशन शेअर केले. सोसायटीने या अॅपवर नोंदणी करून पिवळ्या पिशव्यांमध्ये धोकादायक कचरा वेगळा करण्यास सुरुवात केली आहे.
स्वच्छ भारत अभियानांतर्गत शहर स्वच्छ ठेवण्यासाठी आणि जबाबदारीने कचरा व्यवस्थापनासाठी बीएमसी व आरनिसर्ग फाउंडेशनशी सहकार्य करण्याचा संकल्प सोसायटीने व्यक्त केला.
