प्रतिनिधी(अजित जगताप) : छत्रपती शिवाजी महाराजांची राजधानी असलेल्या सातारा जिल्ह्यात लष्करी सेवेमध्ये देश सेवा करण्याची परंपरा आहे. याच लष्करी सेवेतील आजी-माजी सैनिकांनी साताऱ्यात नुकताच 82 वा लष्करी कॉर्पस डे मोठ्या उत्साहामध्ये साजरा केला.
पश्चिम महाराष्ट्र, सातारा जिल्हात पहिल्यांदाच इलेक्ट्रॉनिक्स आणि मेकॅनिकल इंजिनियर (ई एम ई) परिवारातील सेवानिवृत्त व सेवेमध्ये असलेले सैनिक या आनंदी सोहळ्यामुळे भारावून गेले होते . यापूर्वी असा सोहळा पश्चिम महाराष्ट्रात साजरा झाला नव्हता. तो सातारा जिल्ह्यात साजरा करून भविष्यात बडा खाना कार्यक्रम संपूर्ण सैनिक कुटुंबीय साठी घेण्याचे यावेळी आग्रहाची मागणी करण्यात आली. त्याला सर्व आजी-माजी सैनिक अधिकाऱ्यांनी उदंड प्रतिसाद दिला. सातारा येथे ८२ व्या ई एम ई कॉर्पस डे सोहळा पहिल्यांदाच करण्यात सातारा रहिमतपूर रस्त्यावरील साई संगम या हॉटेलमध्ये करण्यात आला. यावेळी लष्करी शिस्त व सेवेची चुणूक पाहण्यास मिळाली. एकमेकांचा परिचय व एकमेकांची आपुलकीने विचारपूस करणारे वरिष्ठ अधिकारी पाहून अनेकांचे मन भारावून गेले.
या कार्यक्रमासाठी कराड, फलटण, कोरेगाव, रहिमतपूर, जावळी, तरडगाव, महाबळेश्वर, खंडाळा, वाई, पाटण, पाचवड, पाचगणी, दहिवडी, सातारा, अपशिंगे, नागठाणे, मेढा, वडूज, औंध, कातरखटाव, पुसेगाव, तासगाव, परळी, कळंबे, मायणी, गो, कोडोली, लिंब सातारा जिल्ह्यातील विविध तालुक्यातून सेवानिवृत्त व सेवेमध्ये असलेल्या सैनिकांनी सक्रिय सहभाग नोंदवला.
महाराष्ट्राचे आराध्य दैवत श्रीमंत छत्रपती शिवाजी महाराज यांच्या पुतळ्यास पुष्पहार व दीप प्रज्वलित करून या सोहळ्याला सुरुवात झाली.
