सातारा (अजित जगताप) : लोकशाहीमध्ये सर्वांना अधिकार दिलेले आहे आणि हा अधिकार संविधानाच्या माध्यमातून भारतीय नागरिकांना उपभोगता येतो. त्यामध्ये कुणीही आडकाठी आणू नये परंतु, सध्या सातारा जिल्ह्यात लोकसभा निवडणूक लढवण्यासाठी काही अपक्ष रिंगणात उतरले आहेत. त्यांना शुभेच्छा आहेत पण एकूणच निवडणुकीची मागील आकडेवारी पाहता अपक्षांना मत म्हणजे नोटाला मत कारण अनेक जणांच्या डिपॉझिट जप्त होते. पण, ज्यांनी मतदान केलेले आहे त्यांचे प्रश्न सुटू शकलेले नाहीत. या अर्थाने काही अपक्षांना मत म्हणजे नोटाला मत जात आहे. हे कोणी विसरून जावू नये.अशी आता खुली आमच्या चर्चा सुरू झालेली आहे. भारतीय राज्यघटनेने व संविधानाने मतदानाचा अधिकार दिलेला आहे. हा अधिकार आपण वापरलाच पाहिजे. कारण, आपण लोकांचे लोकप्रतिनिधी निवडून देत आहे. याची जाणीव ठेवून मतदान करणे. हे राष्ट्रीय कर्तव्य आहे. त्यामुळे अनेक जण मतदान करतात. पण, काही वेळेला चुकीच्या व्यक्तीला मतदान केले तर पाच वर्षे नव्हे तर एक पिढी बरबाद होते. खरं म्हणजे प्रतिनिधीचा अर्थ त्या लोकांच्या समस्या मांडणारे व्यक्ती असा आहे.
सातारा जिल्ह्यामध्ये धरणग्रस्तांचे प्रलंबित प्रश्न महामार्गावरील टोलनाच्या बाबत वसुली व सर्विस रोडची दुरावस्था, महागाई, बेरोजगारी, आरक्षण व नागरी सुविधा अशा विविध कारणांसाठी आंदोलन होतात तसेच निवेदन दिले जाते. अगदी उदाहरण द्यायचं झालं तर मराठा क्रांती मोर्चा असेल किंवा एकच पर्व… बहुजन सर्व…, अल्पसंख्याकांच्या अधिकाराचा प्रश्न असेल किंवा भटक्या विभक्त जाती जमातीचा प्रश्न असेल. या प्रश्नासाठी रस्त्यावर उतरणाऱ्या कार्यकर्त्याला निवडणूक लढवण्याचा अधिकार आहे.
एखाद्या राजकीय पक्षांनी उमेदवार लादला तर त्याला विरोध करण्यासाठी काही अपक्ष निवडणूक लढवत आहेत. त्यांचे स्वागत आहे. जे कधीही कोणत्याही आंदोलन सहभागी होत नाहीत. एखाद्या समाज घटकावर अन्याय झाला तर त्याबाबत आवाज उठवत नाहीत. अशा व्यक्तींचा जन्म फक्त उमेदवारी लढवण्यासाठी आहे का ? हा सुद्धा आता मतदार विचार करू लागलेले आहेत.
