नवी मुंबई : ‘नशामुक्त भारत’ आणि ‘सायबर सुरक्षा जागरूकता’ या दोन अत्यंत महत्त्वाच्या विषयांवर नवी मुंबई पोलिसांनी आज विद्यार्थ्यांमध्ये जनजागृती निर्माण करण्यासाठी एकत्रित प्रयत्नांची सुरुवात केली आहे. या उपक्रमांतर्गत आज सकाळी डीएव्ही पब्लिक स्कूल, सेक्टर ११, ऐरोली येथे विद्यार्थ्यांसाठी ‘सायबर सुरक्षा जागरूकता आणि इंटरनेटचा योग्य वापर व दुष्परिणाम’ या विषयावर विशेष मार्गदर्शन सत्र आयोजित करण्यात आले.
या कार्यक्रमाचे नेतृत्व पोलीस उपनिरीक्षक वर्षा कल्याण काळे यांनी केले असून वरिष्ठ पोलीस निरीक्षक बाळकृष्ण सावंत यांचे मार्गदर्शन लाभले. शाळेतील सुमारे २०० ते २५० विद्यार्थी आणि शिक्षक मोठ्या संख्येने या कार्यक्रमाला उपस्थित होते.
कार्यक्रमाच्या प्रारंभी PSI वर्षा काळे यांनी इंटरनेटच्या आभासी जगातील धोके, ऑनलाइन आर्थिक फसवणूक, सायबर बुलिंग, सोशल मीडियाचा अतिवापर, मानसिक आरोग्यावर होणारे परिणाम, वैयक्तिक माहितीची सुरक्षितता, फेक न्यूज ओळखणे, तसेच अनोळखी व्यक्तींशी संवाद साधताना घ्यायची काळजी यांसारख्या विषयांवर सविस्तर मार्गदर्शन केले. त्यांनी सादरीकरण (Presentation) आणि वास्तव उदाहरणांच्या माध्यमातून हा गंभीर विषय विद्यार्थ्यांना सोप्या भाषेत समजावून सांगितला.
मार्गदर्शनानंतर ‘सायबर सुरक्षा जागरूकता शपथ विधी’ घेण्यात आला. विद्यार्थ्यांनी आणि शिक्षकांनी एकत्रित शपथ घेतली की, “आम्ही इंटरनेट आणि डिजिटल साधनांचा वापर जबाबदारीने करू, वैयक्तिक माहिती सुरक्षित ठेवू, सायबर गुन्हेगारीपासून स्वतःचे रक्षण करू आणि इतरांनाही जागरूक करू.”
कार्यक्रमाच्या शेवटी शाळेच्या मुख्याध्यापकांनी सांगितले, “आजच्या डिजिटल युगात मुलांना तंत्रज्ञानापासून दूर ठेवणे शक्य नाही, मात्र त्याचा सुरक्षित वापर शिकवणे ही आपली जबाबदारी आहे. हा उपक्रम त्या दिशेने एक महत्त्वाचे पाऊल आहे.”
‘
नशामुक्त शाळा’ अभियानाची सुरुवात
याचबरोबर, रबाळे पोलीस ठाण्याच्या वतीने ‘नशा मुक्त शाळा’ या अभियानाची सुरुवात करण्यात आली आहे. या उपक्रमाचा शुभारंभ घणसोली येथील न्यू बॉम्बे स्कूलमध्ये झाला. कार्यक्रमादरम्यान विद्यार्थ्यांना अमली पदार्थांच्या दुष्परिणामांविषयी माहिती देण्यात आली तसेच माहितीपट आणि पोस्टर्सच्या माध्यमातून व्यसनामुळे होणारे शारीरिक, मानसिक आणि सामाजिक परिणाम दाखवण्यात आले.
विद्यार्थ्यांनी “नशामुक्त जीवन जगू आणि समाजातही याबाबत जागरूकता निर्माण करू” अशी शपथ घेतली.
या वेळी वरिष्ठ पोलीस निरीक्षक बाळकृष्ण सावंत म्हणाले, “गुन्हेगारी रोखण्याबरोबरच सामाजिक जबाबदारी पार पाडणे हे आमचे कर्तव्य आहे. नवी मुंबईतील इतर शाळांमध्येही असे उपक्रम राबवले जाणार आहेत.”
एकत्रित प्रयत्नांतून जागरूक समाजाची निर्मिती
सायबर सुरक्षा आणि नशामुक्ती या दोन्ही मोहिमांचा उद्देश एकच — विद्यार्थ्यांना जबाबदार, सजग आणि सुरक्षित नागरिक बनवणे. पोलिसांच्या या दुहेरी जनजागृती उपक्रमाला विद्यार्थ्यांकडून आणि शिक्षकांकडून मिळालेला उत्स्फूर्त प्रतिसाद पाहता हा उपक्रम यशस्वी झाल्याचे स्पष्ट झाले.
