मुंबई : मुंबईच्या सीएसएमटी स्थानकावरुन एक मोठी बातमी समोर आली आहे. दोन दिवसांपूर्वी २९ एप्रिलला या ठिकाणी लोकलचा एक डब्बा रुळावरुन घसरला होता. आज पुन्हा एकदा त्याच ठिकाणी लोकल रुळावरुन घसरली आहे. या पॉइंटची दुरुस्ती करुन रिकामी लोकल चालवण्यात येत होती, मात्र चाचणीदरम्यानच ही रिकामी लोकल रुळावरुन घसरली.
या घटनेमुळे हार्बर लाईनवरील वाहतूक सीएसएमटी ते वडाळा दरम्यान दोन्ही बाजूंनी पूर्णपणे बंद झालेली आहे. जोपर्यंत लोकल पुन्हा रुळावर येत नाही, तोपर्यंत वाहतूक बंद राहणार आहे. १ मे रोजी सुट्टी असल्याने तितकासा फटका बसला नसला तरी आजच्या दिवशी प्रवास करणार्‍यांचे यामुळे हाल झाले आहेत.
दरम्यान, हार्बर लाईनवर रुळावरुन घसरलेला डबा पुन्हा रुळावर आणण्याचा प्रयत्न सुरु आहे. मात्र, तोपर्यंत हार्बर लाईनवरील वाहतूक विस्कळीत राहणार आहे. याशिवाय हार्बर मार्गावरील वेळापत्रक देखील कोलमडणार आहे.
