मुंबई : मुंबई महानगरपालिकेत तब्बल 30 वर्षे 3 महिने निष्ठेने, प्रामाणिकपणे आणि सामाजिक जाणीवेने सेवा बजावणारे उपप्रमुख अभियंता (रस्ते), पू. उपनगर श्री. संजय तात्याबा सोनवणे ३१ मे रोजी सेवानिवृत्त होत आहेत. त्यांच्या कार्यकाळात वेळेचे काटेकोर पालन, कामातील कुशलता आणि लोकाभिमुख दृष्टीकोन या बाबींनी त्यांना एक आदर्श प्रशासक म्हणून ओळख मिळवून दिली आहे.
शून्यातून सुरुवात – शिखराकडे वाटचाल
पुणे जिल्ह्यातील इंदापूर तालुक्यातील एका खेडेगावातून शिक्षण घेऊन मुंबईस आलेले संजय सोनवणे यांनी व्ही. जे. टी. आय. माटुंगा येथून बी. ई. (सिव्हिल) पूर्ण केली. त्यानंतर १ मार्च १९९५ रोजी मुंबई महापालिकेत घाटकोपर उपप्रमुख अभियंता कार्यालयात दुय्यम अभियंता म्हणून त्यांची नेमणूक झाली. विशेष योगायोग असा की, ज्या कार्यालयातून त्यांनी कारकिर्दीची सुरुवात केली, त्याच कार्यालयातून ते उपप्रमुख अभियंता म्हणून सेवानिवृत्त होत आहेत.
कामात वेळेचं भान आणि सामाजिक भान
त्यांच्या संपूर्ण सेवाकाळात “कल करे सो आज कर” या उक्तीचा ते कायम आग्रह धरत आले. सकाळी ६.३० वाजता तक्रारीच्या ठिकाणी स्वतः हजर राहून नागरिकांच्या समस्या जाणून घेणे आणि तत्काळ उपाययोजना करणे ही त्यांची कार्यपद्धती होती. त्यांच्या नेमक्या आणि वेळेच्या आदर्श नियोजनामुळे कामांमध्ये अचूकता आणि जलद गती कायम होती. त्यामुळे ते “वेळेचा आदर करणारे अधिकारी” म्हणून महापालिकेत परिचित होते.
प्रशासनात विविध भूमिका
संजय सोनवणे यांनी सहाय्यक आयुक्त (कुर्ला एल विभाग, पी साऊथ, घाटकोपर एन विभाग), जी नॉर्थ (इमारत बांधकाम), एसआरए, सीवरेज, एसडब्ल्यू, पर्जन्य जलवाहिनी विभाग आदी अनेक विभागांत कार्य करताना उल्लेखनीय कार्य केले. प्रत्येक ठिकाणी त्यांनी जनतेच्या गरजांना केंद्रस्थानी ठेवून निर्णय घेतले. अधिकारी, कर्मचारी आणि नागरिक यांच्यात विश्वासाचा दुवा बनून त्यांनी शांततेत अनेक आंदोलनांनाही मार्ग दिला.
कर्मचाऱ्यांना प्रोत्साहन देणारे नेतृत्व
काम करणाऱ्या कर्मचार्‍यांचे निरीक्षण करणे आणि त्यांचे चांगले काम खुलेपणाने कौतुकाने पुढे आणणे ही त्यांची खास शैली होती. अशा वागणुकीमुळे अनेक कर्मचाऱ्यांना कार्यप्रेरणा मिळाली. त्यांनी आपल्या अधिकारपदाचा उपयोग सत्तेसाठी नव्हे, तर समाजासाठी सेवा देण्यासाठी केला.
कौटुंबिक आधार आणि शिक्षणाची परंपरा
संजय सोनवणे हे आपल्या यशाचं श्रेय त्यांच्या पत्नी वंदना सोनवणे, बंधू विश्वनाथ, वहिनी सविता, तसेच दोन उच्चशिक्षित मुलींना देतात. एका मुलीने अमेरिकेतून एम.एस. पूर्ण करून तिथे स्थायिक होण्याचा मान मिळवला आहे, तर दुसरीने बी.ई. करून फॅशन मॅनेजमेंटमधून पदव्युत्तर शिक्षण घेतले आहे. संजय सोनवणे यांच्या पत्नीने त्यांच्या कामाच्या वेळा कधीही न विचारता त्यांच्या समर्पित सेवेला मूकपणे पाठिंबा दिला, हे ते आवर्जून सांगतात.
सेवा, समर्पण आणि स्मरण
संजय सोनवणे यांची ही तीन दशके फक्त एक नोकरी नव्हती, तर एक सेवा परंपरा होती. त्यांनी दाखवलेल्या कर्तव्यपरायणतेचे, कामातील निष्ठेचे आणि जनसेवेतील जिव्हाळ्याचे कौतुक सहकारी अधिकारी, कर्मचारी आणि नागरिक करत आहेत.
संजय सोनवणे यांना त्यांच्या सेवानिवृत्तीनिमित्त हार्दिक शुभेच्छा!
त्यांची सेवा, कार्यशैली आणि सामाजिक बांधिलकी येणाऱ्या अधिकाऱ्यांसाठी प्रेरणादायी ठरेल, याची खात्री आहे.
