प्रतिनिधी : पश्चिम बंगाल विधानसभा निवडणुकीच्या निकालानंतर राज्यातील राजकीय वातावरण चांगलेच तापले असून मुख्यमंत्री ममता बॅनर्जी यांनी आक्रमक भूमिका घेत केंद्र सरकार आणि निवडणूक आयोग यांच्यावर गंभीर आरोपांची सरबत्ती केली आहे. निकालानंतर घेतलेल्या विशेष पत्रकार परिषदेत त्यांनी स्पष्ट शब्दांत सांगितले की, त्या सध्या कोणत्याही परिस्थितीत राजीनामा देणार नाहीत.
“आम्ही नैसर्गिकरीत्या हरलो नाही, तर नियोजित कट रचून आम्हाला पराभूत करण्यात आले आहे,” असा खळबळजनक दावा त्यांनी केला. “जर पराभव प्रामाणिकपणे झाला असता, तर मी नैतिकतेच्या आधारावर तात्काळ राजीनामा दिला असता. मात्र जिथे चोरी करून विजय मिळवला गेला आहे, तिथे झुकण्याचा प्रश्नच नाही,” असे त्या ठामपणे म्हणाल्या.
मतमोजणीदरम्यान आपल्यावर शारीरिक हल्ला झाल्याचा धक्कादायक आरोपही त्यांनी केला. “मला धक्काबुक्की करण्यात आली, पाठीवर व पोटावर लाथा मारण्यात आल्या आणि मला मतमोजणी केंद्राबाहेर ढकलण्यात आले,” असा गंभीर अनुभव त्यांनी मांडला.
या निवडणूक प्रक्रियेवर प्रश्नचिन्ह उपस्थित करत ममता बॅनर्जी यांनी भारतीय जनता पार्टी आणि निवडणूक आयोगावर पाच प्रमुख आरोप केले. त्यांच्या मते, निवडणूक आयोगाने जनतेचे घटनात्मक अधिकार हिरावून घेतले असून ‘ईव्हीएम’मध्ये मोठ्या प्रमाणावर गैरव्यवहार झाला आहे. मतदानाच्या दोन दिवस आधी तृणमूल काँग्रेस कार्यकर्त्यांवर धाडी टाकून अटक करण्यात आल्याचा आरोप त्यांनी केला. तसेच, प्रशासनावर नियंत्रण मिळवण्यासाठी आयएएस आणि आयपीएस अधिकाऱ्यांच्या मोठ्या प्रमाणावर बदल्या करण्यात आल्याचे त्यांनी सांगितले.
मतमोजणी केंद्रांवरील परिस्थितीवर बोलताना त्या म्हणाल्या की, केंद्रीय सुरक्षा दल आणि बाहेरील घटकांच्या मदतीने केंद्रांवर ताबा मिळवण्यात आला. “आमच्या प्रतिनिधींना प्रवेश नाकारण्यात आला, माझी गाडीही अडवण्यात आली,” असे त्यांनी नमूद केले. ‘SIR’ प्रक्रियेच्या नावाखाली सुमारे १०० जागांवर फेरफार झाल्याचा आरोप करत त्यांनी सांगितले की, सुरुवातीला ९० लाख नावे मतदार यादीतून वगळण्यात आली होती, त्यापैकी केवळ ३२ लाख नावे न्यायालयीन हस्तक्षेपानंतर पुन्हा समाविष्ट झाली.
या संपूर्ण प्रकरणात पंतप्रधान नरेंद्र मोदी आणि गृहमंत्री अमित शहा यांचा थेट सहभाग असल्याचा गंभीर आरोपही ममता बॅनर्जी यांनी केला. “देशातील सर्वोच्च घटनात्मक संस्थांचा वापर राजकीय फायद्यासाठी केला जात आहे,” अशी टीका त्यांनी केली.
दरम्यान, या आरोपांमुळे पश्चिम बंगालमधील राजकारण आणखी तापण्याची शक्यता असून पुढील काही दिवसांत या प्रकरणावर मोठा राजकीय संघर्ष पाहायला मिळण्याची चिन्हे आहेत.
